MANILA – Nagpaandam ang Department of Health sa publiko tuhoy sa unauthorized disclosure sang pangalan sang coronavirus patients kun sa diin ang violators ang mahimo nga mapreso kag magbayad sang multa nga P2 million.
Ang nasambit nga lihok sang ahensya ang kasunod sang report tuhoy sa listahan sang COVID-19-positive patients nga nagalapta online.
Santo sa statement sang Department of Health, makabig nga illegal ang pagpalayag sang detalye sang isa ka COVID-19 positive bangud nga mahimo ini nga magtuga sang stigma.
Ginpahayag man sang ahensya nga ang COVID-19 ang indi isa ka death sentence kag ang pagbatyag sang kahadlok amo ang nagapalala sa sitwasyon.
Nakasaad sa Republic Act 11332 ukon Mandatory Reporting of Notifiable Diseases and Health Events of Public Health Concern Act nga dapat magapabilin nga pribado ang personal information sang pasyente.
Magluwas diri, may yara man sang joint memorandum ang ahensya kag ang National Privacy Commission nga ang concerned health-care providers, public health authorities kag authorized personnel amo lamang ang may access sa personal details sang COVID-19 cases.
Ang unauthorized access kag illegal disclosure sang personal information sang COVID-19 patients ang may nagakaigo nga silot santo sa Republic Act 10173 ukon Data Privacy Act of 2012.
