Nagpaandam si Health Secretary Ted Herbosa batok sa community transmission sang mpox ukon kilala anay nga monkeypox virus.
Ini kasunod sang kumpirmasyon nga naka-rekord na ang Pilipinas sang una nga kaso sang amo nga balatian kasunod sang pagdeklarar sang World Health Organization (WHO) nga isa ini ka public health emergency.
Suno sa Department of Health (DOH) chief, isa ka 33-anyos nga lalaki sa Metro Manila ang infected nga subong nahilanat kag may rashes sa nawong, likod, likod sang liog, lawas, palad, kag iban pa nga parte sang lawas.
Ginabulong ini subong sa isa ka government hospital kag nagapadayon ang contact tracing.
Talalupangdon nga wala sang history ang pasyente nga naka-byahe ini sa luwas sang pungsod nga nagakahulugan suno sa tiglikom nga diri sa Pilipinas naghalin ang virus kag indi ini imported.
Matandaan nga antes ang bag-o nga outbreak sa Africa, may siyam na nga daan ka kaso sa Pilipinas sang 2023.
Ang mpox isa ka balatian nga tuga sang monkeypox virus.
Una ini nga na-rekord sa mga amo sang 1958 kag ang una nga transmission sang virus sa tawo ang natabo sang 1970.
Mahimo maglaton ang balatian paagi sa direct contact sa body fluids ukon skin-to-skin contact.
Lakip sa sintomas sini amo ang skin rash ukon mucosal lesions nga ginaupdan pa sang fever, headache, muscle aches, back pain, low energy, kag swollen lymph nodes.
