Nagpaandam ang Department of Health (DOH) kaangot sa holiday heart syndrome nga mahimo matuga sang tuman nga pag-inom sang makahulubog nga ilimnon, pagbatyag sang stress, kakulang sang pahuway, kag pagkaon sang maalat nga mga pagkaon.
Suno kay Health Secretary Teodoro Herbosa, subong nga sinakuay ang mga handa kadungan sang holidays, dapat nga hagan-haganon sang mga Pinoy ang pagkonsumo sang maasin, matambok, kag matam-is nga mga pagkaon.
Sa baylo, ginapanugyan ang pagpili sang mga prutas kag mga utan kag magpangita gid sang oras agud nga maka-ehersisyo.
Ini ang lyabe suno sa health official agud nga malikawan ang holiday heart syndrome. Ini nga kondisyon sang korason mahimo nga mag-resulta sa arrhythmia ukon sa abnormal heart rhythm nga magaresulta naman sa stroke.
Sang nagligad lamang nga weekend, nagpatigayon ang ahensya sang Ligtas Christmas Hospital Preparedness and Response Rounds para masigurado nga handa ang mga ospital sa pagtatap sa mga pasyente nga may holiday heart syndrome kaangay sang stroke.
Sa trend sang 2023, na-rekord sang DOH ang 38 stroke cases sa bulan lamang sang Disyembre kag nagsaka pa sa 42 cases nga na-rekord naman sa Enero 2024.
Naka-record man ang health department sang 110 cases sang acute coronary heart syndrome sang Disyembre 2023 nga nakadangat sa 115 sang Enero 2024.
