ILOILO CITY – Nagakadapat nga sundon sang employers ang interim guidelines nga ginpaguwa sang Department of Health 6 may kaangtanan sa returning workers bilang pangaman sa second wave sang COVID-19 pandemic.
Sa ginpaguwa nga general guidelines sang Department of Health, kinahanglan nga may yara sang business continuity plan ang tagsa ka employer bilang kabahin sang preventive measures.
Suno kay Department of Health 6 Assistant Regional Director Dr. Ma. Julia Villanueva, lakip sa business continuity plan amo ang work arrangement agud nga malimitahan ang numero sang empleyado kag nagakadapat nga may yara sang ginapatuman nga protocol sa sulod sang opisina.
Magluwas diri, ang employer mismo ang magagasto sa COVID-19 test sang mga empleyado nga may influenza-like symptoms lakip na ang mga may yara sang direct contact sa infected person tuga sang nature of work.
Para naman sa mga empleyado nga mag positibo sa COVID-19 test, nagakadapat nga sila ang ipaidalom sa isolation samtang ang mga nagnegatibo naman ang mahimo nga magpadayon sa trabaho.
Ginadumili-an nga magbalik sa trabaho ang mga empleyado nga may yara na nga daan sang COVID-19 symptoms, asymptomatic kag may yara sang travel history sa mga lugar nga may kaso sang nasambit nga virus agud nga indi na malatnan ang iban.
Nahibalu-an nga ang nasambit nga memorandum sang Department of Health ang pirmado ni Sec. Francisco Duque III kag napetsahan sang Mayo 11.
