Ginhatagan sang pasalig sang Department of Health (DOH) nga masarangan sang health system sang pungsod ang nagataas nga kaso sang leptospirosis.
Suno sa tigpamaba sang DOH nga si Assistant Secretary Albert Domingo, ang sistema sa ikaayong lawas maka-uyat sang nagakaigo nga mga pasyente nga may leptospirosis.
Nagtukod man sang hotline ang DOH para sa mga kaso sang leptospirosis bangud ginahingyo sini ang publiko nga magpabulong kun maka-eksperyensya sang sintomas.
Naglunsar ang ahensya sang mga hotline kahapon kon sa diin, ang numero sang cellphone ang mahimo kontakon sang mga doktor kag mga pasyente nga may leptospirosis. Pareho sa tion sang pandemya sang COVID-19, ang isa mahimo magtawag sa amo nga numero agud tan-awon kon diin nga ospital ang available.
Nagasaka man ang kaso sang leptospirosis sa mga ospital sang gobyerno nga National Kidney and Transplant Institute (NKTI) kag San Lazaro Hospital.
Ang NKTI gymnasium ginhimo nga isa ka leptospirosis ward bangod sang pagdagsa sang mga pasyente pagkatapos sang pagsalakay sang Tropical Cyclone Carina-enhanced Southwest Monsoon.
Halos 70 ka mga indibidwal nga may leptospirosis ang gin-admit sa NKTI tubtob sang Biernes.
Nagpangabay ang NKTI sang dugang nga 20 ka mga nurses kag 10 pa ka mga doktor gikan sa DOH agud masabat ang kakulang sang manpower.
Nahibaluan nga ang kaso sang leptospirosis humalin Hulyo 1 tubtob Hulyo 27 naglab-ot sa masobra 1,400.
Ginalauman nga magataas pa ini humalin sang nagluntad ang Bagyo Carina kag ang Southwest Monsoon sang Hulyo 24.
