Nagapanikasog na ang Department of Health (DOH) matapos nga naka-record sang 6,703 ka kaso sang Human Immunodeficiency Virus (HIV) halin Enero tubtob Abril 2025. Ini nagaangut sang average nga 56 ka bag-o nga kaso kada adlaw sa una nga apat ka bulan sang tuig — 44% ini nga mas mataas kumpara sa amo man nga panahon sang 2024.
Ang kadam-an sa mga bag-o nga kaso amo ang mga pumuluyo nga naga-edad 15 tubtob 25 anyos, nga may 500% nga pagtaas. Lakip man sa mga na-diagnose ang isa ka 12-anyos nga kabataan halin Palawan, nga naimpeksyon bangud sang pakighilawas.
Suno kay Health Secretary Teodoro Herbosa, ang Pilipinas subong may pinakamadamo nga bag-o nga kaso sang HIV sa Western Pacific region. Gani, ginpanawagan sang DOH kay President Ferdinand Marcos Jr. nga magdeklara sang national public health emergency batok sa HIV.
Ang proposal halin sa Philippine National AIDS Council, nga amo ang ahensya nga naga-atipan sang pagpugong kag kontrol sang HIV kag AIDS sa pungsod. Suno kay Herbosa, dapat tani nga may pagtipon ang gabinete parte sini, apang masami napostpone tungod sang iban pa nga isyu.
Bisan pa sini, nagapadayon ang DOH sa pagpreparar sang programa sa sulod sang anum ka bulan agud masabat ang padayon nga pagsaka sang kaso sang HIV.
Sa kabug-usan, may 150,433 ka tawo nga nagakabuhi upod sa HIV (PLHIV) sa Pilipinas sang Abril 2025.
Ang kadam-an sang PLHIV subong yara sa mas bata nga age group — 50% naga-edad 25 tubtob 34 anyos. Sang 2002 tubtob 2005, ang 44% sang PLHIV yara sa 35-49 anyos nga age group.
Gintumod ni Herbosa ang pagdamo sang “risky behavior” pareho sang pakighilawas sa indi kilala nga tawo, indi protektado nga pakighilawas, kag ang epekto sang dating apps kag madali nga pag-access sang pornograpiya — nga nagadugang sa paglapta sang virus.
Suno sa DOH, sexual transmission gihapon ang nagapanguna nga rason sang paglapta sang virus. Mga 83% sang mga kaso halin 1984 amo ang mga lalaki nga may pakighilawas sa kapareho nga lalaki.
