ILOILO CITY — Napabilin sang Department of Health (DOH) nga “low risk” ang Pilipinas sa bag-o nga variant sang COVID-19 nga “FLiRT” variant.
Ini kasunod man sa ginpaguwa nga record sang ahensya kaangot sa amo nga balatian.
Sa interview sang Bombo Radyo kay Dr. Philip Ian Padilla, Assitant to the Director for the Philippine Genome Center in Diliman, iya ginpahayag nga apisar nga yara sa low risk ang pungsod sa Flirt Variant, nagasaka sa gihapon ang kaso sa pila ka parte sang kalibutan.
Suno kay Padilla, kapareho lamang ang sintomas sang variant sa COVID-19 nga naga-eksperyensya sang hilanat, ubo, runny nose, kag nagakadulaan sang sense of smell ukon ang ikasarang nga makasimhot.
Ginpahayag man sini nga mild lamang ang mga sintomas sang amo nga variant apang wala ini nagakahulugan nga safe ang isa ka indibidwal nga makabatyag sang amo nga balatian.
Gin-athag man sini nga kun nakabatyag na sang mga nasambit nga sintomas kag indi gilayon matumod kun ano nga sakit ang nabatyagan, gilayon nga mag-isolate agud malikawan na nga makalaton sa iba.
