Ginpahayag sang Department of Health (DOH) nga preparado ang Pilipinas batok sa Nipah virus kag nagpanawagan sa publiko nga magbantay kag mangin mahinalungon.
Suno sa DOH, ang Nipah virus isa ka rare zoonotic disease nga nagahalin sa mga sapat, labi na sa mga fruit bats, kag mahimo man makalaton halin sa baboy kag kabayo.
Nahibaluan nga una na naka-ekperensya sang amo nga virus sa Pilipinas sang tuig 2014 sa Sultan Kudarat, kun sa diin 17 ka kaso ang na-rekord kag wala na sang bag-o nga kaso magluwas sadto.
Samtang padayon naman nga ginamonitor sang DOH ang tanan nga airport kag pantalan paagi sa Bureau of Quarantine kag nagapatuman sang updated nga mga guidelines sa pagpugong sang ginapangatubang na naman nga virus.
Ginpangabay man sang DOH ang publiko nga likawan ang pagkaon sang paniki kag mga nagamasakit nga mga sapat bangud sa possible impeksyon nga matuga sini.
Dugang pa sang ahensya nga siguraduhon nga aprubado ang mga produkto nga karne kag lutuon sang maayo ang pagkaon.
Ginaliwat-liwat man Sang DOH nga wala sang dapat kabalak-an bangud preparado sila sa posible nga kaso sa pungsod.
