ILOILO CITY – Indi pa makahatag sang sabat ang Department of Health Region 6 tuhoy sa ginaduso sang Department of Transportation nga pagpanubo sa 0.75 meter nga physical distance sang tagsa ka pasahero sa mga pampubliko nga salakyan.
Sa interview sang Bombo Radyo kay Dr. Marie Jocelyn Te, COVID-19 spokesperson sang Department of Health Region 6, iya ginpahayag nga indi pa siya makahatag sang konkreto nga sabat bangud nga wala pa sang opisyal nga panugyan gikan sa central office.
Suno kay Te, ginakonsiderar man sang Department of Health ang nasambit nga proposal apang mas makapaayo kun istoryahan kag tun-an anay ang tuhoy diri antes ipatuman sa Setyembre 14.
Apisar sini, ginpahayag ni Te nga nahangpan man niya nga katuyu-an lamang sang Department of Transportation nga makabulig kag mapahagan-hagan ang pagpamigado sang mga driver sang pampubliko nga salakyan.
Nahibalu-an nga gin-aprobahan na sang Inter-Agency Task Force ang proposal sang Department of Transportation nga panubu-an sa 0.75 meter ang physical distance sang tagsa ka pasahero gikan sa one-meter distance nga ginapanugyan sang World Health Organization.
