ILOILO CITY – Ginalantaw nga isa sa mayor nga rason sang pagtimbuok sang kaso sang COVID-19 sa syudad sang Iloilo amo ang nagapauli nga Locally Stranded Individuals (LSIs) nga COVID-19 positive.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang Department of Health Region VI, iya ginpahayag nga magluwas man sa mga LSI, isa sa ginhalinan man sang mga local transmission amo ang sa mga merkado kag mall sa diin masami nalapas ang minimum health protocol.
Suno kay Juanico, ang katungdanan nila amo ang maghatag sang guidelines kag pagsulundan sa diin ang Local Government Unit (LGU) amo ang nagapatuman sang ini nga mga health protocol sa syudad sang Iloilo.
Suno kay Juanico, ang LGU man ang responsable sa pagdeploy sang mga health officers sa nanuhay-tuhay nga ahensya sang gobyerno nga amo ang may katungdanan nga magpahanumdom sa publiko nga magsunod sa minimum health protocols kaangay sang pagsuksok sang face mask kag faceshield, kag magsunod sa physical distancing agud malikawan ang COVID-19.
Apang suno sa natungdan, yara sa gihapon sa mga tawo ang desisyon kun magsunod sila sa tanan nga health protocol kun indi.
Liwat man nga nagpahanumdom si Juanico sa publiko, nga mag-angkon sang disiplina sa pagsunod sang health protocol bangud ini ang ‘individual responsibility’ agud malikawan ang nagataas nga kaso sang COVID-19 sa Iloilo City.
Sa pamangkot naman kun may yara na sang bag-o nga variant sang COVID-19 nga nakasulod sa Western Visayas, gin-ako ni Juanico nga santo sa pinakaulihi nga data nga ginpagwa sang Philippine Genome Center, wala pa sang bag-o nga variant sang amo nga virus nga nakasulod sa rehiyon.
