ILOILO – Wala sang gina-uyatan nga data ang Department of Health (DOH) Region VI kun pila na ang nadala sa contact tracing kasunod sang report nga may duha ka local case sang delta variant sang COVID-19 sa Pandan, Antique.
Sa interview sang Bombo Radyo kay Dr. Jessie Glen Alonsabe, pinuno sang Regional Epidemiology and Surveillance Unit (RESU) sang DOH Region VI, iya ginpahayag nga padayon pa subong ang contact tracing kag back tracing.
‘Heightened’ man ang COVID-19 testing suno kay Alonsable apang ‘wala sang balita’ kun ano ang quarantine procedures sa amo nga banwa.
Suno sa natungdan, wala pa subong naga-intra ang DOH Region VI sa trabaho sang Provincial Health Office sa Antique.
Sa backtracing, ginatan-aw pa kun sin-o gid ang nakalaton sang delta variant sa amo nga mga pasyente.
Matandaan nga ang ginatumod nga duha ka local case sang delta variant amo ang mag-asawa nga nagpositibo sa COVID-19 sang bulan pa sang Mayo. Una na nga ginkumpirma sang DOH nga napatay ang 78 nga pasyente nga babayi samtang naka-recover naman ang iya 79 anyos nga bana.
Sa nauna kag separado nga interview sang Bombo Radyo, una na nga ginkumpirma ni Pandan, Antique Mayor Plaridel Sanchez VI nga wala sang travel history ang mag-asawa bangud lunsay senior citizens na ang mga ini.
