ILOILO CITY – Imbestigaran pa sang Deparment of Health (DOH) Region VI kun may direct link ang COVID-19 vaccine sa kamatayon sang isa ka police personnel sang Arevalo Police Station.
Ang Regional Epidemiology and Surveillance Unit (RESU) ang magapatigayon sang pagpangusisa apang ginahulat pa subong ang investigation report halin sa Iloilo City Health Office.
Yari ang timeline sang hitabo santo sa interviews sang Bombo Radyo:
* Hunyo 17, nag-avail sang first dose sang COVID-19 vaccine ang pulis
* Hunyo 18, naglain ang pamatyag sang pulis gani nga nag-file sang sick leave
* Hunyo 25, nagturong ang mata kag napatay ang pulis bangud sa cardiac arrest
* Hunyo 26, naggwa ang resulta sang COVID-19 test kag ginpahayag nga positibo ini sa COVID-19
Sa interview sang Bombo Radyo kay Dr. Bea Natalaray, designated spokesperson kag head sang non-communicable diseases sang DOH Region VI, iya ginpahayag nga POSIBLE nga may exposure na sa COVID-19 ang pulis antes pa man ang vaccination.
Santo sa protocol sa vaccination, ginapaiway kuntani sa inoculation ang mga tawo nga may exposure sa COVID-19 pati na ang mga tawo nga currently positive sa virus.
May diabetes ang amo nga police personnel gani pahayag ni Natalaray, posible gid nga ma-cardiac arrest ini ‘ilabi na kun uncontrolled bangud madamo na nga comorbidities ang ma-associate sa indibidwal nga diabetic.’
Sa subong, hibaluon pa sang RESU ang medical record sang police.
‘INDI PWEDE NGA IANGOT NA NATON [ANG KAMATAYON] SA BAKUNA’
Suno naman kay COVID-19 team spokesperson Mr. Jeck Conlu, gina-check na subong ang medical background ukon health history sang amo nga pulis.
Nagapanindugan si Conlu nga indi anay pwede nga i-angot ini nga kaso sa COVID-19 vaccination bangud tan-awon pa kun ano ang natabo antes nagpatublok sang bakuna ang pulis.
Nagpasalig man si Conlu nga indi pagpabay-an sang City Health Office ang pag-usisa sa sini nga kaso.
Ginalauman man nga indi ini maakaapekto sa acceptance sang mga tawo sa nagapadayon nga vaccine rollout sa syudad sang Iloilo.
