MANILA – Gindepensahan ni Presidente Rodrigo Duterte si Department of Health Secretary Francisco Duque III.
Sa public address, gin-engganyo ni Duterte si Duque nga indi anay magbiya sa pwesto bilang tiglikom sang Department of Health.
Suno kay Duterte, nakabati siya sang istorya nga maga-resign si Duque bangud sa kontrobersiya nga ginabato sa iya may kaangtanan sa kurapsyon sa Philippine Health Insurance Corp. (PhilHealth) kun sa diin nagaserbe nga ex-officio chairman ang DOH Secretary.
Gin-ako naman ni Duque nga apektado na ang iya pagtulog bangud sa pag-ulamid sa iya sa kurapsyon sa PhilHealth.
Kadungan sini, wala man napunggan ni Duque nga magpabutyag sang pagkadismaya sa Senate Committee of the Whole report nga nagaduso nga paakaan siya sang kaso nga malversation kag graft and corruption may kaangtanan sa kwestyonable nga paggasto sang PhilHealth funds paagi sa Interim Reimbursement Mechanism.
Sa pagpaathag ni Duque, baseless findings ang kaundan sang Senate Committee of the Whole report bangud nga indi man siya kabahin sang deliberasyon kag wala man siya sang may ginpirmahan nga resolusyon may kaangtanan sa IRM fund distribution.
