ILOILO CITY – Nagahulat na lamang si Department of Health Region VI director Adriano Suba-an sang resulta sang fact-finding investigation nga ginpatigayon sang Field Implementation Cluster Team sang ahensya.
Ini ang kaundan sang sabat ni Director Suba-an sa sulat ni Iloilo Second District Representative Michael Gorriceta may kaangtanan sa reklamo sang pila ka mga empleyado kag medical workers sa Western Visayas Sanitarium and General Hospital sa atrasado nga sweldo kag benepisyo.
Sa interview sang Bombo Radyo kay Representative Gorriceta, iya ginpahayag nga base pa sa sabat ni Suba-an, ang problema sa atrasado nga sweldo sang pila ka mga empleyado ang bangud sang technical kag internal nga problema sa ospital.
Nahibaluan nga una na nga ginpahayag ni Medical Chief Dr. Judy Ann Dumayas nga mismo si Mr. Condrad Sorongon nga accountant sang ospital amo ang nagapa-atrasar sang sweldo bangud sa tuyo sini nga pagkontrol sa management humalin pa sang tyempo ni Dr. Annabelle de Guzman.
Nagpanawagan naman si Gorriceta nga dapat nga masolbar ini sa labing madali nga panahon bangud nga apektado ang mga pasyente kag mangin ang mga empleyado.
