ILOILO CITY – Mas importante ang istrikto nga pagpatuman sang minimum health standards ipaanggid sa pagpatuman sang lockdown.
Ini ang pahayag ni Dr. Jessie Glen Alonsabe, pinuno sang Department of Health Region VI – Regional Epidemiology and Surveillance Unit (RESU).
Suno kay Alonsabe, indi na kinahanglan nga ipatuman ang total lockdown sa syudad sang Iloilo apisar sang nagataas nga numero sang COVID-19 cases bangud yara na sa insakto nga direksyon ang localized lockdowns nga gin-implementar sang local government unit (LGU) ukon ang selective lockdown sa mga barangay nga may narecord nga kaso sang virus.
Ginpahayag sang opisyal nga wala sa gihapon sang mahimo nga pagbag-o ang pagpaidalom sa syudad sa ECQ (enhanced community quarantine) ukon MGCQ (modified general community quarantine) kun wala man lang ginasunod sang publiko ang mga protocol.
May kaangtanan diri, ginpahayag ni Alonsabe nga mas maayo kun panumdumon sang isa ka tawo nga siya ang posible halinan sang virus bangud sa sini nga paagi, maobligar siya sa pagsuksok sang face mask agud indi malatnan sang balatian ang iban nga tawo.
