Bukas ang talatapan sang Department of Health Region 6 sa mga nurse kag doktor sa Western Visayas nga interesado mag-volunteer nga iga-deploy sa National Capital Region, Region 3, kag Region IV-A.
Ini ang may kaangtanan sa memorandum ni DOH Asec. Roy Ferrer, pinuno sang Field Implementation and Coordination Team sang Visayas kag Mindanao, nga nagapanawagan sa mga licensed physicians kag nurse nga magbulig sa mga “danger zones” sa Pilipinas nga may mataas nga kaso sang COVID-19.
Sa amo nga memorandum, nakasaad nga sa ngalan sang bayahanihan spirit, ginahingyo ang DOH Region 6 nga magsolicit sang 20 ka doctor agud ideploy sa targeted private hospitals sa nasambit na nga danger zones sa pungsod.
Sa interview sang Bombo Radyo kay Dr. Renilyn Reyes, COVID-19 spokesperson sang DOH Region 6, iya ginpahayag nga nagdagdag naman ang ahensya sang mga probisyon sa mga luyag mag-volunteer.
May yara sang pre-deployment orientation kag capacity building, kompleto nga PPEs, full board kag lodging, full payment sang traveling expenses halin sa point of origin tubtob sa point of destination kag vice versa, monitoring sang health status kag condition, 14 day working schedule deployment, kag mandatory quarantine period pagkatapos sang deployment nga may dala nga bayad.
Sa subong, wala pa sang schedule kun san-o mahimo ipadala ang mga volunteer doctor kag nurse kag mahibaluan lang kun may yara na sang magpalista sa talatapan.
