ILOILO CITY – Nagahulat pa sang guidelines ang Department of Health (DOH)- VI sa ginaduso nga “no booster, no entry” policy sa pagsulod sa mga establishments.
Sa interview sang Bombo Radyo kay Dr. Bea Camille Natalaray, spokesperson sang DOH VI, iya ginpahayag nga wala pa sang official guidelines nga ginpagwa ang national office.
Una na nga ginpahayag ni Presidential adviser on entrepreneurship Joey Concepcion nga ipakita ang booster cards bilang requirement sa pagsulod sa mga enclosed establishments sa bulan sang Hunyo agud nga ma-enganyo ang tawo nga mag-avail sang booster shot.
Suno kay Natalaray, sa mga kabataan naman nga naga-edad 5-11 anyos, wala pa sang guidelines sa inoculation sang booster shot.
Ang ginatutukan sang ahensya subong suno kay Natalaray amo ang primary vaccination sa mga kabataan.
Gina-enganyo naman ni Natalaray ang publiko nga mag-avail na sang booster shot.
