‘Paghugas sang kamot, pagsuksok sang face mask, kag paglikaw sa superspreader events’ sa gihapon ang panugyan sang Department of Health (DOH) Region VI apisar may yara na sang Delta, Alpha, Beta, kag P.3 variant sang COVID-19 sa Western Visayas.
Ang Alpha, Beta, kag Delta variants ang lunsay na-categorize nga ‘variants of concern.’ Una naman nga gin-downgrade sang World Health Organization (WHO) ang classification sang P.3 variant halin sa variant “of interest” padulong sa “alert for further monitoring.”
Sa interview sang Bombo Radyo kay Dr. Jessie Glen Alonsabe, head sang Regional Epidemiology and Surveillance Unit (RESU) sang DOH Region VI, iya ginpahayag nga wala sang dapat bag-uhon sa strategy kundi dapat lang gid nga mag-kooperar ang mga tawo sa gobyerno.
“Wala sang pagbag-o [sa strategy]. Ang himuon naton tanan, seryosohon naton ang panugyan sang national government kag sang local government. Kay te bisan anhon namon, kun wala nagakooperar ang tawo kag wala ginaseryoso ang minimum public health standards, kita man lang gihapon ang maga-suprer,” pahayag ni Alonsabe.
Kasunod ini sang iya pahayag nga Abril pa lang subong nga tuig, may Alpha kag Beta variants na sa Iloilo, Antique, Guimaras, Bacolod City, Capiz, kag Negros Occidental.
Ini ang magluwas pa sa P.3 variant nga yara sa Iloilo province.
Sang nagligad lang nga semana, una naman nga ginpkumpirma nga may duha ka local cases sang Delta variant sa Pandan, Antique.
Suno kay Alonsabe, “Kun gusto naton nga makagwa kita gilayon sa sitwasyon nga ini, kooperar kita. Gamit kita sang aton nga mask. Physical distancing kita. Hugas sang kamot. Likaw sa superspreader events.”
Ginpaathag man sang natungdan nga individual responsibility ang paglikaw nga maglapta ini nga mga variants.
“Indi ini makontrol sang gobyerno ang amo ini nga mga bagay. Indi man pwede nga gobyerno ang mahugas sang aton nga kamot ukon matakod sang imo nga mask. Kada isa sa aton responsibilidad ni naton.”
Indi lang new variants ang basehan suno sa iya kun pasakaon pa ang quarantine status sa apektado nga mga syudad kag probinsya sa rehiyon. Magluwas sa sini nga mga kaso, ginalantaw pa suno kay Alonsabe ang health care utilization rate sa tagsa ka lugar. #
