ILOILO CITY – May ginapasa nga report ang Department of Health (DOH) Western Visayas sa central office kaangot sa monitoring sang mga pharmacy kag iban pa nga balaligyaan sa rehiyon nga nagapalapaw sang presyo sang face masks.
Ini ang kasunod sang asud-asud nga reklamo nga nabaton sang pamunuan sa social media accounts sang DOH sa diin ginapahayag sang mga tagreklamo nga magluwas sa kakulang sa suplay, may overpricing nga nagakatabo.
Sa interview sang Bombo Radyo kay Dr. Mary Jane Juanico, Infectious Disease Section head sang DOH6, iya ginpahayag nga wala sang opisyal nga dokumento nga nagamandu sa pamunuan nga amo ang magapasaka sang kaso sa mga balaligyaan nga nagahimo sang amo nga lihok.
Suno kay Juanico, ang mahimo gid lamang sang DOH amo ang monitoring kag ang pagpasa sang official report sa central office kag sa iban pa nga kaangot nga ahensya kaangay sang Department of Trade and Industry (DTI).
Nahibaluan nga santo sa una nga pahayag ni Regional Director Rebecca Rascon sang DTI6, yara sa jurisdiction sang DOH ang pagpasaka sang kaso sa mga manugbaligya nga nagapasobra sang presyo sang face masks kag ini ang base sa Consumer Act of the Philippines.
