Aminado ang Department of Justice (DOJ) sa limitasyon nga kapasidad sang mga otoridad sa pagpatigayon sang DNA testing sa mga mga tul-an nga narekober sa Taal Lake.
Sa mensahe nga ginpalab-ot ni Assistant Secretary Mico Clavano, spokesperson sang DOJ, iya gin-ako nga may kabudlayan kag kulang sa kagamiton ang Pilipinas sa paproseso sang DNA testing.
Ini ang reaksyon matapos ginpahayag sang Philippine National Police (PNP) nga wala sila sang nakuha nga DNA profile sa mga tul-an nga ila narecober sa nasambit nga lugar.
Bangud sini, ginpahibalo ni Clavano nga nagapangayo na sila sang bulig halin sa gobyerno sang Japan.
Ginsiling sini nga nangayo na sila sang teknikal nga suporta agud masiguro kun sin-o ang mga tag-iya sang mga bangkay nga na-recover.
Sa pihak nga bahin, ginpahayag man ni DOJ Secretary Jesus Crispin Remulla nga ginapadali na nila ang imbestigasyon sa kaso sang mga missing sabungeros.
Suno kay Remulla, pila na ka tuig nga ginatutukan sang ila opisina ang kaso kag ginahingyo niya nga malapit na nila ma-file ang pormal nga reklamo batok sa mga ginatudlo nga responsable.
Ginalauman man sang DOJ nga mas madamo pa nga testigo ang magguwa matapos ma-file ang complaint bilang kabahin sang ila padayon nga case buildup.
