Gina-imbestigaran sang Department of Justice (DOJ) si anay President Rodrigo Duterte sa posible nga paglapas sa international humanitarian law.
Suno kay Justice Secretary Jesus Crispin Remulla, ini nga layi ang ginatun-an man sang International Criminal Court (ICC) kag kapareho nga layi nga may yari man sa Pilipinas.
“International Humanitarian Law ang ating pinupuntirya ngayon kasi it is the law that the ICC is studying as well as the law that we have here, it is the law of the ICC that we are using right now, Republic Act 9851,” suno kay Remulla.
Ginpaathag sini nga ang possible charges nga i-file sa war on drugs ang separado man kag indi mag-overlap sa iya sang ICC.
“Even if we are not members of the ICC, the spirit of complementarity still applies,” dugang sang tiglikom.
Kabahin ini sa ginpakigbahin sang secretary sang ginpamangkot sa update sa task force nga gintukod sang DOJ subong nga Nobyembre agud magtutok sa extrajudicial killings nga nahimo sa idalom sang termino ni Duterte bilang Davao City mayor kag Philippine president halin sang 2016 tubtub 2022.
Suno kay Remulla, sakop sang imbestigasyon ang tanan nga covered sang Revised Penal Code, RA 9851, Philippine Act on Crimes Against International Humanitarian Law, Genocide, and Other Crimes Against Humanity, kag iban pa nga special laws.
Ini nga task force sang DOJ ang gintukod matapos nga nag-ako si Duterte sa Senate hearing kag sa quad committee kun ano ang iya ginmandu sang ginpatuman sini ang drug war.
Nagapanguna sa task force ang senior assistant state prosecutor kag co-chairman ang regional prosecutor kag may siyam ka miyembro halin sa National Prosecution Service (NPS) kag suportado man sang National Bureau of Investigation (NBI).#
