Ginkumpirma na sang Department of Justice(DOJ) ang impormasyon nga nakaguwa na matuod sa house arrest sa Timor Leste ang pugante nga anay mamalidha sang Negros Oriental nga si Arnolfo “Arnie” Teves Jr. nga amo ang ginatudlo mastermind sa Degamo massacre nga natabo sang 2023.
Suno kay DOJ spokesperson Assistant Secretary Mico Clavano, nakabaton ang Philippine justice department sang mensahe halin sa Timorese Central Authority nga nagtakop na ang house arrest kay Teves sang 7 pm Timor-Leste time (6 pm Manila time) sang Byernes, Hunyo 21.
Sa idalom sang layi sang amo nga pungsod, ang mga pugante ang mahimo lamang ma-detain sa sulod sang maximum nga 90 ka adlaw. Apisar nga hilway na ang anay kongresista, iga-monitor siya sang Timorese security forces.
Ginmanduan man ang land, sea, and air border authorities sang amo nga Southeast Asian country nga siguruhon nga magatinir lamang si Teves sa Dili nga amo ang kapital.
Kinahanglan pa nga ipresentar si Teves sa atubang sang korte sa kada duha ka adlaw samtang nga nagahulat sang resulta sang extradition trial. Ini nga desisyon ang natalana nga ipaguwa sa masunod nga semana.
Una na nga ginpahayag sang legal counsel ni Teves nga si Atty. Ferdinand Topacio nga may mga kondisyon nga gin-set kadungan sang pagpaguwa sa anay kongresista lakip na ang regular nga pag-report sa court officer kag commitment nga indi magbiya sa Timor Leste samtang pending pa ang extradition case.
Ang extradition trial sa Timor-Leste Court of Appeals ang nag-ugat sa request sang Philippine government nga isaylo si Teves sa Pilipinas kun sa diin nagapangatubang siya sang kaso nga murder bangud siya ang ginatudlo nga mastermind sa pagpapatay kay anay Negros Oriental Governor Roel Degamo sang Marso 4, 2023.
Sulit-sulit nga ginpanginwala ni Teves ini nga alegasyon kag ginrason nga wala siya sa pungsod sang tion nga natabo ang pagpatay kay Degamo. Halin sang amo nga petsa, wala nakapauli si Teves diri sa Pilipinas.
Magluwas sa ginaalegar nga involvement sa Degamo massacre, ginkasuhan man si Teves bangud sa ginaalegar pagpatay sa tatlo ka iban pa nga mga tawo sa Negros Oriental sang 2019. Sa kasagsagan sini nga mga kaso, ang kongresista kag ang 12 ka iban pa nga mga tawo ang gin-designate sang Anti-Terrorism Council bilang “terorista” bangud sa ginaalegar pagpamatay kag pagpang-harass sa Negros Oriental.
Agusto 2023 naman sang ginsipa ini halin sa Kamara bangud sa padayon nga pag-absent sa trabaho apisar sang iya nga expired na nga travel authority.
