Naghulag na ang Department of Justice (DOJ) agud nga mapakanselar ang mga passport ni former presidential spokesman Harry Roque.
Suno kay Justice Secretary Jesus Crispin Remulla, gin-file sang ahensya ang petisyon sa Angeles City Regional Trial Court sa Pampanga sang nagligad nga Byernes.
Pananglitan ma-cancel ang mga pasaporte ni Roque, mahimo ini mangin undocumented alien. Kun ma-deny pa gid ang application ni Roque para sa asylum sa Netherlands, iga-deport ini suno kay Remulla.
Ginkumpirma man ni Criminal Investigation and Detection Group (CIDG) director Maj. Gen. Nicolas Torre III nga nakahingyo na sila sa International Criminal Police Organization (Interpol) nga magpaguwa sang Red Notice para kay Roque.
Ginhingyo ini insigida matapos nga nag-isyu ang korte sa Pampanga sang warrant of arrest para sa former presidential spokesperson bangud sa kaso nga qualified human trafficking — isa ka non-bailable case.
Ginatudlo si Roque nga involved sa operasyon sang iligal nga Pogo hub nga Lucky South 99 nga ginaakusaran sang trafficking kag iban pa nga scam activities. Nagapanindugan naman ang former Palace official nga ginahingabot lang siya sang Marcos administration bangud loyal siya sa mga Duterte.
