Gintawag sang Department of Justice (DOJ) nga “insincerity kag complacency” ang hulag kag pahayag sang kontrobersyal nga kontraktor nga si Sarah Discaya.
Ini matapos nga magpakita sang finger heart sign kag maglahog sa media samtang ginaimbistigaran angot sa maanomaliya nga flood control projects.
Suno kay Justice Assistant Secretary Mico Clavano, ang tanan nga hulag kag ang pag-finger heart ni Sarah Discaya ang ilakip sa assesment kag evaluation sang Department of Justice, kun bala kwalipikado ini nga malakip sa witness protection program.
Matandaan nga nag-trending ang finger heart sign ni Discaya samtang nagapaguwa ini sa Department of Justice, kadungan sa pagpangusisa sang ahensya sa aplikasyon sang mag-asawa nga Discaya sa WPP.
