Nagpasalig ang Department of Justice (DOJ) nga iga-review sini sang maayo ang request sang kampo ni dismissed Bamban, Tarlac Mayor Alice Guo nga ibasura ang iya ginapangatubang nga kaso nga human trafficking.
Suno kay Justice Undersecretary Raul Vasquez, himuon sang panel sang korte ang mahinalungon nga pag-review apisar nga pila ka beses naman nga nahatagan sang oportunidad si Guo kag ang iya kampo nga magpasa sang counter-affidavit apang wala man nagapamati.
“Masusing aaralin ng panel yan, ng investigating panel. Pati yung pag reopen nila ng isang issue, whether or not she will be granted an opportunity despite the fact that she was given numerous opportunities to file but for one reason or another, she opted to waste all of them,” pahayag sini.
Pahayag pa ni Vasquez, daw kaangay nga ginhulat pa sang dismissed mayor nga manugtapos na ang preliminary investigation kag gulpi man ini nga nagguwa.
“All of a sudden, nung malapit na matapos ang preliminary investigation, ay bigla siyang lumabas at sinabi na as far as she is concerned, she is no longer allowed to file her counter affidavit for her unjustified failure to submit that,” dugang sang opisyal.
Matandaan nga sa iya statement, gin-insister ni Guo nga indi bastante ang mga dokumento kaangay sang electric bill agud makapamatuod nga involved siya sa human trafficking.
Ginpanindugan sini nga ang electric bill ang wala man naga-indicate kun sin-o gid ang yara sa propiedad kag kun sin-o ang nagagamit sang electricity sang ginaalegar natabo ang mga krimen.
Ginatumod sini ang electricity bills sa Philippine Offshore Gaming Operator (POGO) sa Bamban, Tarlac nga nadiskubrehan matapos nga gin-raid sang Philippine Anti-Organized Crime Commission (PAOCC).
Ini nga electricity bills ang napetsahan sang July tubtub sa November 2023.
Nakit-an man sang PAOCC ang statement of account sang Tarlac II Electric Cooperative, Inc. (TARELCO II) nga napetsahan sang February 2024 nga nahingadlan man sa kontrobersyal nga anay alkalde sang Bamban.#
