Ginklaro sang Department of Justice kag sang Department of the Interior and Local Government nga wala pa ini makabaton sang arrest warrant nga ginpahayag gin-issue sang International Criminal Court (ICC) batok kay Senator Ronald “Bato” dela Rosa.
Suno kay Interior Secretary Jonvic Remulla, wala sila nakabaton sang direktiba nga may kaangtanan sa pagpatuman sang arrest warrant sa senador.
Nahibaluan nga nagsugod ang pag-absent sang senador sa sesyon matapos ginpahayag ni Ombudsman Jesus Crispin Remulla nga may gin-issue na nga arrest warrant ang ICC batok sa senador may kaangtanan sa war on drugs sang administrasyon Duterte.
Si Dela Rosa amo ang anay hepe sang Philippine National Police (PNP) kag nagpanguna sa pagpapatuman sang kampanya kontra ilegal nga droga sang nagligad nga administrasyon.
Sa latest post naman ni former presidential spokesperson Harry Roque, ginsiling sini nga madugay ang ICC arrest warrant, apang sang Domingo lang nabaton sang DOJ kag DILG, kag subong lang sila magahulag.
