Gin-athag sang Department of Justice (DOJ) nga wala ini sang nabaton nga impormasyon nga magguwa na ang warrant of arrest sang International Criminal Court (ICC) batok kay former President Rodrigo Duterte kag iban pa nga respondents nga involved sa nagapadayon nga imbestigasyon sa war on drugs sang anay administrasyon.
Matandaan nga si retired Supreme Court Justice Antonio Carpio ang una nagsiling nga posible ipaguwa sang ICC ang arrest warrant sa Septyembre subong nga tuig.
“I think the day of reckoning is coming closer because what I’m hearing is that a warrant of arrest will be issued by the ICC, sometime in September,” kabahin anay sang pahayag ni Carpio sa interview sang political analyst nga si Richard Heydarian.
Apang suno kay Justice Undersecretary Raul Vasquez, wala sila sang ihibalo kaangot diri bangud wala man sang dugang nga mga impormasyon nga ginpalab-ot sa government agencies.
“We are not aware of that. None of our government agencies have been informed about anything. The last action taken by the ICC was to request diplomatic permission from the DFA to conduct interviews, but this was ignored because we are no longer under their jurisdiction,” pahayag ni Vasquez.
Una na nga ginplastar ang posisyon sang gobyerno nga indi sini pagbuligan ang ICC sa imbestigasyon sini apang indi man sini pagpunggan ang korte nga maka-contact sa mga personalidad nga gusto nila i-interview.
Una man nga ginpahayag ni former Sen. Antonio Trillanes IV, isa sa mga partido nga nag-file sang panumbungon sa ICC kaangot sa drug war killings, nga sigurado siya nga magguwa ang arrest warrants antes magtakop ang tuig.
Ini nga imbestigasyon sang korte sa The Hague ang naangot sa alegasyon nga si anay Presidente Duterte ang nag-komiter sang crimes against humanity sang tion nga ginpatuman sini ang war on drugs — bilang Chief Executive kag bilang anay mayor sang Davao City.
