ILOILO CITY – Ginkondena sang Guimaras Provincial Government ang isa ka doktor nga nagpamalibad nga tsekyaron ang mga Persons under Investigation kag Persons Under Monitoring bangud sa coronavirus disease 2019 ukon covid-19.
Sa exclusive interview sang Bombo Radyo Iloilo kay Guimaras Governor Samuel Gumarin, ginkumpirma niya nga may isa ka doktor sa probinsya nga nagpanago bangud nahadlok ini nga maka close contact sa mga PUM’s kag PUI’s.
Suno kay Gumarin, indi batasan sang isa ka health professional ang ginpakita sang doktor.
Ginpahayag pa ni Gumarin nga may ginsumpaan nga katungdanan ang mga doktor kag indi dapat ini pagtalikdan ilabi na subong nga nagapangatubang ang kalibutan sa epidemya sang covid-19.
Sa subong, ginapaimbestigahan na sang Guimaras provincial government ang wala pa ginpangalanan nga doktor.
Nahibaluan nga yara sa 758 ang PUM’S kag 7 ang PUI’s sa bilog nga probinsya sang Guimaras.
