ILOILO CITY- Paimbestigaran sang Department of Labor and Employment (DOLE) Region 6 ang reklamo sang iban nga benepisyaryo sang Tulong Panghanapbuhay sa Ating Disadvantaged/Displaced Workers (TUPAD) nga walo ka bulan gid nga nadelay ang sweldo.
Matandaan nga pila ka benepisyaryo ang nagpalab-ot sa Bombo Radyo sang ila reklamo kon sa diin sang Disyembre 2020 pa sila nag-ubra sa idalom sang TUPAD program apang tubtob subong, wala pa nila nabaton ang ila sweldo.
Sa interview sang Bombo Radyo kay Jesus Elpidio Atal, Assistant Director sang DOLE- Region 6, iya ginpahayag nga bag-o pa lang nakalab-ot sa iya ihibalo ang tuhoy sa amo nga sentimento sang mga benepisyaryo.
Suno kay Atal, sa iya pagkahibalo, nahatag na ang tanan nga sweldo sang mga benepisyaryo sang TUPAD nga sang nagligad nga tuig pa nagtrabaho.
Sa pihak sini, nagpasalig ang natungdan nga bukas ang iya opisina para sa mga benepisyaryo nga may kasubong nga reklamo kag siya mismo ang personal nga magaatender sini.
Sa idalom sang TUPAD program, magatrabaho sang minimun nga 10 ka adlaw ang benepisyaryo nga may P395 nga sweldo kada adlaw.
