Ginpa-Bombo sang mga benepisyaryo ang Department of Labor and Employment (DOLE) bangud sa wala pa nabaton nga sweldo sa idalom sang Tulong Panghanapbuhay sa Ating Disadvantaged / Displaced Workers (TUPAD) program sang nasambit nga ahensya.
Sa interview sang Bombo Radyo kay alyas Toto Alog residente sang Cabugao Sur, Sta. Barbara, Iloilo, iya ginpahayag nagpirma sila sang kontrata sa DOLE agud nga makatrabaho sang 10 ka-adlaw nga may P395 daily nga sweldo.
Apang suno kay Alog, nagdangat na sa masobra isa ka bulan, wala sila sa gihapon sang may nabaton nga sweldo apisar ginpasa naman nila ang kinahanglanon nga mga dokumento sa nasambit nga ahensya.
Ang trabaho sang natungdan lakip na sang kapin 20 niya ka-kaupdanan nga ginhire man amo ang pagkuha sang mga hilamon sa pila ka mga highway.
Samtang, suno naman sa Municipal Administrator sang Sta. Barbara, Iloilo, wala ginapaagi sa local government unit ukon sa mga barangay ang sweldo sang mga benepisyaryo kundi sa DOLE mismo via pera padala centers.
Sa interview sang Bombo Radyo kay Atty. Leo Superio, iya ginpahayag nga nakapasa na ang mga barangay sang mga pangalan sang beneficiaries sang TUPAD program sa DOLE lakip na ang pila ka rekisitos nga kinahanglan para sa sweldo nga ginpasalig sang ahensya.
Apang suno kay Superio, tubtob subong wala pa nakaabot ang pondo nga naghalin sa Asosayon Sang Mangunguma Bisaya-Owa Mangunguman (AAMBIS-OWA) nga ipaagi sa DOLE.
Nahibaluan nga katuyuan saang TUPAD Program sang DOLE nga mahatagan sang trabaho ang mga kubos nga pumuluyo nga tuman ka apektado sang pandemya.
