Gin-athag sang Department of Labor and Employment (DOLE) Region 6 ang Work Stoppage Order nga gin-issue ni Labor Secretary Silvestre Bello III.
Suno kay DOLE Region 6 OIC Regional Director Salome Siaton, ang Work Stoppage Order ang pagpatuman lamang sang Occupational Safety and Health Standards nga ginamandu sang layi nga nagapasiguro nga malayo sa disgrasya ukon risgo sang kamatayon ang mga nagaobra ukon naga baligya sang mga palupok.
May duha ka naidentify nga manufacturer sa syudad kag anom ka mga registered nag retailer suno kay Siaton nga ginbisitahan na kaina sang hubon nga ginatapuan sang DOLE, PNP, BFP, kag Local Government Unit nga gintiglawas sang Busines Process and Licensing Office.
Tanan nga mga nagaobra kag nagabaligya sang palupok ang ginmanduan nga temporaryo anay nga mag-untat tubtob nga mare-assess ang mga ini sang Bureau of Fire Protection (BFP).
Aminado man ang DOLE nga madamu sang maapektuhan sa lihok nga ini sang DOLE apang nagakadapat maintindihan man sang mga ini nga nabutang ang mga ini sa risgo amo man ang ila kabuhi.
Sa mga madulaan naman sang kabuhian, mahimo ang mga ini nga ipaidalom sa Livelihood Program sang DOLE.
Santo man sa Work Stoppage Order, ginamanduan ang DOLE kag iban pa nga mga bureaus nga i-identify ang mga maapektuhan kag hatagan sang palangabuhian nga magabalor sang per capita nga 10 thousand pesos.
Paathag ni Siaton, indi kwarta ang mabaton sang mga ini kundi ang assistance halin sa ahensya base man sa ila mapilian nga palangabuhian nga sayluhan sa ila man pagbiya sa industriya sang paghimo ukon pagbaligya sang palupok.