ILOILO CITY – Nagpapanaog sang work stoppage order ang Department of Labor and Employment (DOLE) sa Akhira’s Manokan and Frozen Food sa diin ginlamon sang meat mixer ang lalaki nga empleyado sa Barangay Mansaya, Lapuz, Iloilo City.
Sa exclusive interview sang Bombo Radyo Iloilo kay DOLE Region 6 Director Cyril Ticao, iya ginpahayag nga katuyuan sang work stoppage order amo nga mahatagan sang kahigayunan ang ahensya nga makapatigayon sang ila imbestigasyon sa bulig man sang Philippine National Police (PNP).
Maluwas diri, ila pa nga hibaluon kun bala menor de edad ang biktima nga si Jomar Junco.
Suno kay Ticao, sa tion nga matukiban nga menor ang biktima, ila gilayon nga ipasirado ang negosyo.
Ginpahayag ni Ticao nga katungdanan sang tag-iya sang nasambit nga Manokan and Frozen Food nga tudluan ang ila mga empleyado sa pagamit sang mga equipment agud indi ang mga ini mabutang sa peligro.
Ginmultahan naman sang DOLE sang P100,000 ang tag-iya sang nasambit nga negosyo kasunod sang pagkamatay sang ila empleyado.
