Mahimo nga ipatuman sang Department of Labor and Employment (DOLE) Region 6 ang wage increase sa mga mamumugon sa bulan sang Nobyembre.
Sa interview sang Bombo Radyo kay Atty. Sixto Rodriguez, Jr., Regional Director sang DOLE Region 6, iya ginpahayag nga ang tikang ang resulta man sang sunod-sunod nga konsultasyon sang talatapan sa publiko ilabi na sa Iloilo kag Bacolod City.
Suno kay Rodriguez, ang public consultation ang isa man ka pamaagi agud nga matumod kon pila ang kantidad nga kinahanglan sa pagpataas sang sweldo.
Gin-athag man sang natungdan nga ang konsultasyon ang mando man halin sa opisina ni President Ferdinand “Bong-bong” Marcos, Jr.
Ginpahayag man sini nga may yara sang labor group nga nagpetisyon sang wage increase nga P150 kada adlaw, samtang may nagpetisyon man sang mas manubo sa P150.
Sa subong, indi pa matumod ang presyo sang wage increase bangud padayon pa nga ginakonsulta ang publiko, mamumugon, kag employers sa Panay Island.
Sang nagligad nga tuig, gin-aprobahan ang Wage Order No. RBVI-27, nga nagtaas sang minimum wage sa non-agricultural,industrial,commercial sector.
Ang mga negosyo nga may masobra sa 10 ka empleyado may yara sang bag-o nga sweldo nga P480, halin sa P450, samtang ang mga may menos sa 10 ka empleyado, nagtaas man sa P450, halin sa P420.
