Nagapanawagan ang Department of Labor and Employement Region 6 sa mga benepisyaryo sang DOLE-CAMP ukon COVID-19 Adjustment Measures Program nga kuhaon na ang ila cash aid sa remittance center.
Sa interview sang Bombo Radyo kay Niezel Sabrido, tagpamaba sang Department of Labor and Employment Region 6, iya ginpahayag nga may yara pa sang 545 ka mga benepisyaryo sang programa sa Western Visayas nga wala makakuha sang P5,000 nga cash aid.
Suno kay Sabrido, may yara na sang ginpadala nga tracking number sa mga benepisyaryo apang wala siya sang ihibalo kun ngaa tubtob subong wala ini sa gihapon makuha.
Kun indi luyag sang mga benepisyaryo nga kuhaon ang cash aid halin sa DOLE-CAMP bangud mahimo nga nakakuha naman ini sang cash assistance halin sa iban nga ahensya sang gobyerno, magpadulong lang sa opisina sang Department of Labor and Employment dala ang Identification Card kag tracking number agud nga mahatag sang ahensya sa iban nga benepesyaryo ang nasambit nga ayuda.
Dugang pa sang natungdan, masobra P2.7 million pa nga cash assistance ang wala matigayon nga makuha sang mga benepisyaryo.
