Nag-angkon sang nagkalain-lain nga reaksyon ang nangin pahayag ni Department of Labor and Employment (DOLE) Secretary Silvestre Bello III nga kakason na lang ang licensure exams.
Matandaan nga ginkwestyon sang tiglikom ang kinahanglanon nga magkuha sang licensure exams bangud suno sa iya, madamo na sang naagyan nga tests ang mga estudyante antes ang mga ini nag-graduate.
Pahayag ni Bello, kadungan sang pagsinapol kaupod ang Philippine Nurses Association kag Philippine Board of Nursing, iya ginrekomenda nga dulaon na lang ang examinasyon kag ginkwestyon man niya kun ngaa kinahanglan pa bala ang exam.
Dugang balayran kag gasto lang ang pagkuha sang licensure exam para sa mga nurses dugang pa niya.
Apang suno kay Bello, nakadepende sa gihapon sa layi kun kinahanglan gid sang mga ini nga magkuha sang examinasyon.
Sa bahin naman sang mga law students, pahayag sang tiglikom, iban sa mga nagakuha sang bar exams kag nag-top sa examinasyon ang indi man nangin maayo nga abogado.
Ibasura man pahayag ni Bello ang pagkuha sang board exams para sa mga engineering kag dentistry.
Dugang pa sang natungdan, ginakonsidera niya ini nga irekomenda bilang hagna sa Kongreso.
