Ginpaathag sang Filipina actress nga si Dolly de Leon nga indi pa ini pwede maka-promote sang iya nga international projects para sa subong nga tuig bangud myembro siya sang grupo sang actors kag writers nga kabahin sang naga-protesta subong sa Hollywood.
Suno kay de Leon, magatutok anay ini sa iya nga local projects, kaangay sa bag-o lang nadag-an nga Best Supporting Actress award sa 2023 Cinemalaya Philippine Independent Film Festival sa iya papel sa “Iti Mapukpukaw” (The Missing).
Ini amo ang labing-una nga first full-length animated feature sa amo nga festival nga nagdaog man bilang Best Film.
Ini man ang labing-una nga acting award nga nabaton ni De Leon halin sa Pilipinas.
Antes pa man sini, na-anunsyo na nga magabida siya sa pila ka projects overseas lakip na sa second season sang “Nine Perfect Strangers” kaupod kay Nicole Kidman.
Indi pwede para kay de Leon nga ipalayag ang iya foreign films bangud kabahin siya sang Screen Actors Guild – American Federation of Television and Radio Artists nga pila ka bulan na nga may strike sa Hollywood para sa mas mataas nga sweldo kag nagapanawagan man sang restrictions sa paggamit sang artificial intelligence sa projects.
Nahibaluan man nga magahalin na kuntani ini sa Pilipinas para sa shooting sang “Nine Perfect Strangers,” apang postponed subong ang amo nga byahe kag amo man ang shooting.
