ILOILO CITY – Napaslawan nga makasulod sa listahan sang final nominees sa Best Supporting Actress sa 95th Academy Awards ang international Filipina actress nga si Dolly de Leon.
Sa official YouTube channel sang Oscars, ang mga nominees para sa Best Supporting Actress amo sanday Angela Bassett sa “Black Panther: Wakanda Forever”; Hong Chau sa “The Whale”; Kerry Condon sa “The Banshees of Inisherin”; Jamie Lee Curtis sang “Everything Everywhere All At Once”; kag Stephanie Hsu sang “Everything Everywhere All At Once”.
Nakilala si Dolly sa international scene sa iya pagdala bilang cleaner kag toilet manager nga si Abigail sa Ruben Ostlund’s Palme d’Or-winning satire “Triangle of Sadness,” kun sa diin, gin-nominate man siya para sa Best Supporting Actress sa Golden Globe Awards kag sa British Academy Film Awards.
Ang Oscars awards night ang hiwaton sa Marso 12 kun sa diin mangin host si Jimmy Kimmel.
Kahapon, si Dolly ang ginkilala nga Best Supporting Actress sa Guldbagge Awards nga amo ang equivalent sang Oscars sa Sweden.
