Gina-engganyo sang Department of Finance (DOF) ang Japanese investors nga magbubo sang kuwarta sa Pilipinas ilabi na sa mga sektor nga bag-o lang ginbuksan sa mas masangkad nga foreign investments paagi sa gin-amyendaran nga mga layi.
Sa isa ka investors’ briefing subong nga semana, ginpahayag ni Finance Secretary Carlos Dominguez III sa atubang sang Japanese businessmen nga sa idalom sang liberalization laws nga gin-aprubahan ni Presidente Rodrigo Duterte sang damlag lang, pwede na sa full foreign ownership ang airline, media, retail, private transportation, renewable energy, kag telecommunications sectors.
Ginatumod ni Dominguez ang pag-amyendar sa Foreign Investments, Public Services, amo man sa Retail Trade Liberalization laws.
Bangud mas mahapos na ang market entry sa retail industry para sa foreign retailers, gina-engganyo sang finance chief ang Japan nga mag-establisar kag magpasangkad sang ila nga retail trade operations sa Pilipinas.
Una na nga gin-estimate sang DOF nga yara sa at least $10 billion ukon P521.15 billion ang ma-attract nga brick-and-mortar foreign direct investment (FDI) kada tuig bangud sa tatlo ka nasambit nga economic liberalization laws, nga dugangan pa sang Corporate Recovery and Tax Incentives for Enterprises (CREATE) Act. ##
