Antes pa man ang makahalawat-hawat nga away sang Filipino ring icon nga si Manny Pacquiao, dapat man bantayan sang Pinoy boxing fans ang nagahilapit nga sambuwa sang four-division world champion nga si Nonito Donaire, Jr.
Matabo ang 12-round bout sa Hunyo 14 sa Buenos Aires, Argentina nga mas una pa sa hampang ni Pacquiao nga nakatalana sa Hulyo sa Las Vegas, Nevada.
Sandig sa World Boxing Association (WBA), makasumpong sang 42-anyos nga The Filipino Flash ang 28-anyos nga si Andres Campos nga halin sa Chile.
Nakataya sa hampang ang Interim WBA Bantamweight title.
Katapusan nga nakit-an sa ring si Donaire sang Hulyo 2023 batok kay Alexandro Santiago. Ang nasambit nga Mexican boxer amo ang nagdaog via unanimous decision agud ma-claim ang sang amo nga tion bakante nga WBC world bantamweight belt.
Sa pagbalik naman ni Donaire sa hampang, gina-uyatan sini ang ang 42-8 fight record lakip na ang 28 knockouts. Markado naman sang 17-2-1 record si Campos lakip ang anum ka knockouts.
Ang magadaog sa Donaire-Campos fight ang possible nga mahatagan sang oportunidad nga mahangkat ang regular WBA belt nga subong ginapanag-iyahan ni bantamweight champion Antonio Vargas.
