Mapilitan ang anay Filipino world champion nga si Nonito Donaire Jr. nga magpangita sang iban nga kasumpong agud makuha liwat ang titulo nga world champion matapos nag-atras ang Australian boxer nga si Jason Moloney sa ila natalana nga sambuwa.
Naka-schedule kuntani nga mag-atubangay sanday Donaire kag Moloney para sa bakante nga World Boxing Council (WBC) bantamweight crown nga ginbuy-an sang damlag lang sang Japanese icon kag undisputed champion nga si Naoya Inoue bangud ginpili sini nga magsaka sa super bantamweight class.
Apang suno kay WBC president Mauricio Sulaiman, wala na sang interes si Moloney nga lagson pa ang bantamweight title.
Wala man sang problema nga nakit-an ang council sa Filipino boxer bangud handa ini nga atubangon ang bisan-o sin-o nga kasumpong.
Si Donaire ang nagauyat sang rekord bilang pinakatigulang nga boksidor nga nagadaog pa sang bantamweight title.
Sa edad nga 38, gin-knockout sini ang unbeaten WBC titlist nga si Nordine Oubaali sang Mayo 2021. Ginsundan pa ini sang isa ka madinalag-o nga title defense sang gintumba man sini si Reymart Gaballo sang Disyembre 2021.
Apang sang Hunyo sang nagligad nga tuig, nalutos si Donaire sa kamot sang three-division world champion nga si Inoue kag halin sadto, wala na ini nakabalik sa boxing ring. ##
