Naghakot na gilayon sang million followers si anay US President Donald Trump pila ka oras matapos nga nag-intra naman ini sa TikTok, isa ka China-based application nga gintinguhaan man sini anay nga i-ban sa Estados Unidos base bangud sa pamahog sa national security.
Paagi sa TikTok, mas mapalapit ni Trump ang iya kampanya sa mas bataon nga mga botante para mabuligan siya sa iya tuyo nga magbalik sa White House.
Siya ang presumptive nominee sang Republicans apang sang nagligad lamang nga semana, napamatbatan siya nga guilty sa 34 counts sa hush money trial nga amo ang nagamarka sang labing-una nga tion nga na-convict ang presidente sang USA sa kaso-kriminal. Sa Hulyo 11 pa natalana ang sentensya.
Sa iya account, nag-post si Trump sang video nga nagatamyaw sa iya fans sa Ultimate Fighting Championship fight sa Newark, New Jersey.
Nahibaluan nga ang Democratic incumbent nga si President Joe Biden nga magapa-reelect man sa November 5 presidential election ang naglunsar naman sang iya kampanya sa TikTok. Ini apisar nga ginpirmahan sini ang hagna nga maga-ban sa application kun indi ini pag-ibaligya sang Chinese owner nga ByteDance sa lain nga tag-iya.
Ang pag-dumili sini sa Estados Unidos ang naka-base sa national security grounds bangud ginakahangaw-ang nga ihatag sa Chinese government ang data nga makuha sang TikTok gikan sa 170-million ka American users.
