Gina-engganyo sang Department of Science and Technology (DOST) ang mga Pinoy nga maggamit na lang sang electric bikes kag re-chargeable nga vehicles sa tunga sang problema sang padayon nga pagsaka sa presyo sang gatong.
Suno kay DOST Undersecretary Renato Solidum Jr., nagapatigayon ang ahensya kag ang pila ka unibersidad sang mga pagtuon may kaangtanan sa development sang power source para sa mga salakyan nga ginagamitan sang elektrisidad.
Apang gin-athag ni Solidum nga indi mahapos ang pagpangita sang charging stations para sa electric vehicles.
“Yung technology, dinevelop at na-prove. So, ito ay iko-commercialize. Siyempre para maging successful din yung commercialization, ma-patronize din ‘yan,” suno kay Solidum.
Ginagamit na sang mga Pinoy ang electric bikes agud nga makatipid sa plete kag gatong kasunod sang asud-asud nga pagtimbuok sang presyo sang produktong-petrolyo.
Sa Kamara, tatlo ka mga committee ang nag-apruba sang hagna nga amo ang nagtukod sang national energy policy kag regulatory framework para sa paggamit sang electric vehicles sa pungsod.
Ini nga hagna ang nagatuyo nga engganyuhon ang paggamit sang public kag private sector sang electric vehicles.
Sa guidelines sang Land Transportation Office (LTO) sa paggamit sang electric vehicles, nakasaad nga ginapahanugutan ang personal mobility scooters nga magtabok sa private roads.
Ang electric motorcycles, tricycles, kag vehicles nga may four wheels ang dapat nga magpa-rehistro sa LTO. Dapat nga may lisensya man ang driver. Ginapahanugutan man sila nga magtabok sa national roads.
Sang Pebrero, gin-report sang Land Transportation Franchising and Regulatory Board (LTFRB) nga may 367 man ka operational electric jeepneys sa bilog nga pungsod. ##
