ILOILO CITY- Ginabasol sang Department of Tourism ang negatibo nga publicity kun ngaa tuman nga nagnubo ang tourism rate sang Guimaras kasunod sang Iloilo Strait tragedy sa diin 31 ka tawo ang napatay.
Sa interview sang Bombo Radyo kay Atty. Helen Catalbas, director sang Department of Tourism Region 6, iya ginpahayag nga nagnubo sang 73% ang tourist arrivals sa isla sang Agusto kag Setyembre subong nga tuig kun ipaanggid sa amo man nga period sang 2018.
Suno kay Catalbas, base sa data sang Guimaras Provincial Tourism Office, yara lang 19,439 ka turista ang nagbisita sa isla sang Agusto samtang 16,908 ka mga turista naman ang na- record sang Setyembre.
Ginpahayag ni Catalbas nga ini nga numero ang mas manubo sa 49,295 ka mga turista nga narecord sang Agusto 2018 kag 31,856 sang Setyembre sang nagligad nga tuig.
Nagpanugyan si Catalbas nga dapat nga untatan na ang negative publicity kag positive publicity ang dapat ipalapnag ilabi na sang mga Guimarasnon.
Kaangot sini, magapakigsapol ang regional director sa duha ka higante nga telecommunications company sa rehiyon agud makighinun-anon kon ano ang mahimo nga mabutang nga teknolohiya sa probinsya agud mabuhi liwat ang turismo.
Magapakig-istorya man si Catalbas sa mga katapo kag estudyante sang Guimaras State College agud makahimo sang solusyon nga liwat ma-promote ang turismo sang Guimaras.
