ILOILO CITY – Nagapangabay ang Department of Tourism sa magagmay nga accommodation establishments nga magbukas agud nga may yara sang matiniran ang Returning Overseas Filipinos sa bug-os nga Western Visayas.
Ini ang ginahingyo ni Department of Tourism Region 6 Director Atty. Helen Catalbas may kaangtanan sa problema tuhoy sa kakulang sang quarantine facilities.
Sa interview sang Bombo Radyo kay Catalbas, iya ginpahayag nga ang Overses Workers Welfare Administration amo ang nagaserbe nga lead agency sa repatriation samtang assistant agency lamang ang Department of Tourism.
Suno kay Catalbas, indi makapahilabot ang Department of Tourism sa nagakatabo nga transaksyon sa tunga sang Overses Workers Welfare Administration kag sang management sang accommodation establishment.
Ini bangud nga ang katungdanan lamang sang Department of Tourism amo ang paghatag sang rekomendasyon kag sang listahan sang mga lisensyado nga accommodation establishments apang daku ang mabulig sang tagsa ka Local Government Unit agud nga mahimo nga temporaryo nga quarantine facility ang mga beach resort, dorm kag hotel nga nahamtang sa tagsa ka banwa sa Rehiyon 6.
