Plano sang Iloilo City Government nga ma-improve ang trapiko sa siyudad kag agud mabuligan ang mga commuters nga mas mapahapos ang ila pagbyahe.
Bangud sini, gindayaw ni Department of Transportation (DOTr) Assistant Secretary Dioscoro Reyes ang people-centered nga panan-aw ni Iloilo City Mayor Raisa Treñas sa pagpatuman sang transport modernization, nga nagatuyo indi lamang sa pagbag-o sang mga salakyan kundi sa kaayuhan sang mga driver, operator kag commuters.
Suno kay Reyes, importante ang kooperasyon sang publiko kag local government agud mangin madinalag-on ang mga reporma sa pampubliko nga transportasyon, ilabi na sa pag-atubang sang mga krisis pareho sang pagsaka sang presyo sang gatong.
Pahayag pa niya, ang pagplano sang alkalde sa kahimtangan sang siyudad sa masunod nga tatlo ka tuig nga may midterm vision para sa mas efficient kag inklusibo nga sistema sang transportasyon ang nagapakita sang paghatag prayoridad sa kaayuhan sang mga driver, operator kag commuters.
Apang, ginpahayag man ni Reyes nga ang plano ni Treñas, indi magmadinalag-on bisan ano nga pa nga mga tikang ang paga-ubrahon kun wala sang disiplina kag kooperasyon sang mga Ilonggo.
Dugang pa nga sa gina-plano nga mga reporma, pagasiguraduhon nga tun-an sang maayo ang pagplano kag indi pagpabay-an nga may madulaan sang palangabuhian.
