Nagapanindugan ang Department of Transportation (DOTr) nga indi kinahanglan nga untaton ang implementasyon sang kontrobersyal nga Public Transport Modernization Program (PTMP).
Suno kay Transportation Undersecretary Andy Ortega, sandig sa final figures sang ahensya, ang nationwide consolidation rate pagkatapos sang April 30 deadline ang nagdangat na sa 83 percent nga tuman na ka bastante.
Pahayag pa sini, sa ginatos ka transportation cooperatives, duha ka grupo na lang ang naga-insister nga magpangindi sa pag-upod sa konsolidasyon .
Kasunod sang resolution nga gin-file sang mga senador para sa suspensyon sang programa, nagsabat man si Ortega sa isyu sa pinansyal bangud ginapahayag nga nagapamatok ang jeepney drivers kag operators bangud mahal ang balayran sa modern jeepney units.
Suno sa opisyal, nag-request na ang ahensya sang mas daku nga budget nga P2.9 billion para sa equity subsidies halin sa nauna nga P1.3 billion nga alokasyon.
Gin-ako man sini nga sa orihinal nga P2.9 billion request sang ahensya, wala gani sa isa ka bilyon ka pesos ang gin-aprubahan sang Department of Budget and Management (DBM) bangud sa fiscal constraints, apang suno sa natungdan, nagalaum sila nga makabulig ang Kongreso agud nga masolbar ini.
Gindugang sini nga nagapakig-istorya man sila sa iban pa nga financial institutions sa paglaum nga makahatag ang mga ini sang dugang nga pondo para sa transport cooperatives kag corporations.
Nahibaluan nga 22 ka mga senador ang nagpirma sa Senate Resolution 1096 nga nagapanawagan sang suspension magluwas lamang kay Senator Risa Hontiveros nga natalana pa magpaathag sa iya rason.
Ang nagpirma sa resolution amo sanday Senate President Francis Escudero, Majority Leader Francis Tolentino, Minority Leader Koko Pimentel, Pro Tempore Jinggoy Estrada, Raffy Tulfo, Nancy Binay, Alan Peter Cayetano, Pia Cayetano, Ronald dela Rosa, JV Ejercito, Sherwin Gatchalian, Bong Go, Lito Lapid, Loren Legarda, Imee Marcos, Robinhood Padilla, Grace Poe, Bong Revilla, Joel Villanueva, Cynthia Villar, Mark Villar kag Juan Miguel Zubiri.
