ILOILO CITY – Nagakinahanglan sang dugang nga pagpanalawsaw bag-o ilisan ang disenyo sang mga pumpboat nga nagabiyahe Iloilo-Guimaras vice versa.
Sa interview sang Bombo Radyo kay Department of Transportation Sec. Arthur Tugade, iya ginpahayag nga indi madali ang ginaduso nga pag-ilis sang desinyo sang mga pumpboat.
Suno kay Tugade, nagakinahanglan nga balanse ang patigayunon nga pagtuon agud nga mapasangkad ang sea transportation sa Iloilo kag Guimaras.
Bangud nga masami na nga may nagakatabo nga insidente sa Iloilo Strait, ginpahayag ni Tugade nga tion na agud nga maghimo sang lihok ang gobyerno para sa kaayuhan sang pumuluyo.
May kaangtanan diri, ginpasalig sang tiglikum nga iya gid nga tinguhaan nga mahatagan sang development ang mga pantalan sa Iloilo kag Guimaras.
