𝗠𝗔𝗡𝗜𝗟𝗔 — Wala sang tuyo ang Department of Transportation (DOTr) nga temporaryo nga untaton ang Public Utility Vehicle Modernization Program (PUVMP) apisar nga 22 sa 24 ka mga senador ang nagpirma sang resolusyon nga nagahingyo nga untaton anay ang implementasyon sang amo nga programa.
Suno kay Department of Transportation Undersecretary Andy Ortega, ginarespeto sang departamento ang suhestyon sang Senado, apang padayunon nila ang programa kag istoryahan sa mga apektado nga sektor ang mga butang nga gintudlo sang mga mamalidha.
Kun balikan, sang Miyerkules, 22 ka mga senador ang nagpirma sang Senate Resolution 1096 nga nagahingyo sa gobyerno nga temporaryo nga pauntaton ang implementasyon sang PUVMP, ukon ang Public Transport Modernization Program (PTMP).
Gintumod sang mga senador ang pila ka mga isyu may kaangtanan sa programa, lakip na ang mataas nga numero sang unconsolidated Public Utility Vehicle units, phaseout sang iconic nga desinyo sang jeepney, manubo nga porsyento sang mga ruta kag iban pa.
Sa sulat nga ginpadala sa Senado antes pirmahan ang resolusyon, nagpaandam si Department of Transportation Secretary Jaime Bautista sang “unintended consequences” kun mauntat ang programa.
Sa pihak nga bahin, nagpanugyan si Ortega sa mga consolidated Public Utility Vehicle operators kag drivers nga padayunon ang ila operasyon sa pihak sang ginpaguwa nga resolusyon sang Senado.
Sa separado nga pahayag sang Land Transportation Franchising and Regulatory Board (LTFRB) ginpahayag sini nga wala sang direktiba nga naghalin sa Palasyo ukon sa DOTr nga untaton ang nasambit nga programa.
Suno kay LTFRB chairperson Teofilo Guadiz III, ginapasalig nila ang mga drivers, operators, kag stakeholders nga nagpartisipar sa PUVMP nga magapadayon tubtob wala sang direktiba nga magahalin sa Presidente kag sa Department of Transportation (DOTr) nga pauntaton ang programa.
Ginpahayag man ni Guadiz nga apisar nga ginarespeto nila ang desisyon sang Senado, ang PUVMP amo ang sabat sang gobyerno agud masabat ang nagapalala nga mga problema nga may kaangtanan sa transportasyon kag ang Lupon nagapabilin nga komitido sa paghatag sang luwas, episyente nga serbisyo sa riding public kag mas maayo nga sektor sang transportasyon.
