Ginpatuman epektibo subong nga adlaw, Abril 1, ang daku nga pagsaka sa presyo sang liquefied petroleum gas (LPG).

Sa advisory sang Petron, nagsiling ini nga P20 kada kilo ang ginsaka sang LPG epektibo kaina sang tungang gab-i.

Bangud sini, P220 na ang isaka sa presyo sang kinaandan nga 11-kilogram LPG cylinder.

Sa Solane naman, nagsaka ang LPG price sang tubtub P17 kada kilo epektibo alas sais subong nga aga.

Suno sa duha ka mga kumpaniya, gina-reflect sini ang international contract price sang LPG para sa Abril.

Sa data halin sa Department of Energy (DOE), as of March, ang presyo sang 11-kilo LPG tank ang nagatupa na sa P818.62 tubtub P1,128.62.

Una na nga nagpaandam ang LPG Marketers Association (LPGMA) nga posible makalab-ot ang presyo sang isa ka LPG tank sa P1,500 sa Abril bangud sa mataas nga balayran sa shipping bangud sang paglain sang ruta sa Middle East sa tunga sang nagapadayon nga gyera.#