ILOILO CITY – Ginakabig sang Iloilo City Government nga non-compliant ang Double Dragon Properties bangud sa kapaslawan nga maghatag sang master development plan kag iban nga mga business requirements sa madugay nga tinion.
Sa interview sang Bombo Radyo kay Iloilo City Councilor Atty. Sedfrey Cabaluna, Chairman sang Committee on Transportation sa konseho, iya ginpahayag nga wala sang sabat kag wala man sang komunikasyon nga nabaton ang Iloilo City Government halin sa nasambit nga kompanya sa pihak sang ila panawagan.
Suno kay Cabaluna, wala man sang financial statements kag revenue sharing breakdown ang kompaniya humalin sang Hulyo 2018 tubtob Hulyo 2022.
Magluwas diri, natukiban man sang Office of the Building Official nga wala man ini naka-comply sa requirement para sa building permit kag occupancy certificate.
Bangud diri, magahatag ang Iloilo City Government sang 60-day grace period sa Double Dragon Properties sa diin kun mapaslawan ang mga ini sa pag-comply sang requirements, posible nga bawion ang business permit sang kompaniya.
